財政預算案一如預期沉悶，唔怪得有議員睇美眉相自娛，財爺宣佈今年度再推iBond，算是難得嘅亮點，由於屬零風險投資，戰友們點都要申請。
周二推介嘅時代集團（1023），噚日再升7%，正向歷史高位進發，繼續坐定定。蠟筆小新食品（1262）正在整固，戰友亦可分段收集。北海集團（701）報喜，預期盈利將大增，股價即爆升14%，從估值、概念及財務狀況三方面分析，走勢應有餘未盡，buy！
講估值，北海2012年每股盈利3.15仙，用盈喜起錶價升五成計，則每股盈利4.725仙，市盈率降至8.4倍，如果驚喜價升一倍，市盈率更低見6.3倍，比起過去五年平均嘅13.2倍，平足五成！
講概念，去年底曾披露，正研究分拆部份業務獨立上市，現時主打製漆產品、物業投資、鋼鐵貿易，瓣瓣皆有盈利貢獻，北海最新市值僅7億多，一旦分拆成事，兩間公司嘅殼價都唔止呢條數，認真抵到爛。假設今年派息係咁易增加五成，息率已接近四厘，配合手頭淨現金達1.6億銀，防守力一流。
北海噚日收報0.395元，成功企穩早前阻力區0.385元樓上，技術走勢轉好，短炒先以今年高位0.56元做目標，潛在升幅逾四成，屆時PB都只係一倍多啲啲。
唐牛