【中環】影視大亨邵逸夫（六叔）嘅遺孀方逸華（六嬸），自從上個月喺邵氏影城為六叔舉行完追思會後，一直深居簡出，不過時間係治傷痛嘅最好方法，經過個幾月嘅休息，六嬸終於現身。前晚9點半，六嬸嗰架掛住中港牌嘅七人車泊咗喺中環嘅中國會，冇耐司機揸咗架車去隔籬嘅置地廣場嘅側門，跟住見到六嬸連埋疑似男助手、仲有兩女一男，一行五人喺商場度行出嚟，睇嚟佢哋係喺嗰度食完晚飯走人。
友善揮手
沿途六嬸同班朋友有傾有講，心情睇嚟幾好，聽到記者同佢打招呼，六嬸一啲都冇抗拒，仲笑得好開心，但係嗰個疑似男助手一支箭走咗去擋喺六嬸前面，諗住人肉幫佢擋鏡頭，不過見慣大場面嘅六嬸又點會咁易嚇親，佢即刻笑住同個男助手話：「唔緊要！唔緊要！老友記嚟㗎！」以前六嬸見到記者影相都冇咁熱情，最多只係笑笑口打招呼，似乎佢最近嘅心情真係唔錯，之後佢仲邊行邊揮手打招呼，好友善任影唔嬲，最後成班朋友上咗七人車走人。
採訪、攝影：黃曉程、李志明