香港是一個只會在網上俾like的城市。
現實生活，香港人從來只會豎起，另一隻手指。
香港人的刻薄，薄過姨媽巾，滲出斑斑血漬。
你很難博得香港人同情，譬如認同你是窮人。你試試在FB說自己是「窮人」，馬上便會有人搭訕：「窮人仲有錢上網你都真係好×窮囉」。
電視播出基層家庭生活苦況，香港人卻以為是播放「找錯處」遊戲，不是想辦法如何援助有需要人士，而是誓死找出破綻，「×你！無錢買牛肉但碌架床上面堆咗咁多盒高達模型嘅！」「咁都叫窮？我屋企都無高達模型喎！」
香港人聽見有「窮人個案」，便會異常興奮，集體找出窮人身上的富貴元素：「×你！窮人屋企有部冷氣機嘅？件外套仲厚過我嘅！又話窮！仲有錢買咁多本漫畫嘅？」
香港人誓要在屍體堆中找出燦爛鮮花然後冷冷說一句「×！有幾慘啫！扮×晒嘢！」
香港人看不到弱勢社群要幫助的地方，只會用最尖酸刻薄的眼光去挑剔：「窮就咪×生咁多個仔啦！」「無人叫你嫁落嚟香港嘅死大陸婆！」「你地唔覺得佢自己都有問題㗎咩？」
近年流行「中產基層」個案，月入五至七萬都要做月光族，這些「中產基層」個案一出，通常都會被人插到體無完膚，離不開諷刺他們「大花筒、扮中產、你咁都嗌救命其他人咪跳樓？」
香港人最愛說「我地當年邊有政府幫？咪又係咁樣捱過嚟！」其實和王敏超以黃金寶都無隊醫來否決呂品韜的要求一樣咁衰格。
刻薄的香港人眼中，這個世界無窮人，即使窮也是自己攞嚟jean；他們堅信世上只有一類窮人是真心窮值得幫，就是，自己。