有朋友在面書轉載《蘋果》新聞圖片，加插自己意見時，先明示「不喜勿插」：「諗拆座位的人個腦係咪有問題？朝早有傷殘、有身孕或者有需要的人士都是需要坐的，假如你是他們兼且車程很長，你捱到嗎？」先觸動我神經的是「不喜勿插」那三個字！她這位朋友比我快手，有和我一樣的意見：「其實你唔需要講不喜勿插吖，你個fb係你地頭，你鍾意post乜係你自由喎，如果有人喺你地盤插你係冇品！而且呢單嘢如果咁都企喺地鐵嗰邊，我諗嗰啲人一係離晒地，一係有着數，一係就係個腦有問題嘅！」
在自己地頭表達個人意見還要如此多顧忌，做人做得咁辛苦？雖然擺得上面書都知不會是甚麼秘密，之但係公開來看得到的那些，不應該都是朋友來的嗎？道不同不是不相為謀的嗎？我們不是都有權選擇朋友的嗎？不是應該帶眼識人的嗎？朋友之間貴乎尊重，看法有不同的時候，各自表述是互相交流學習，增加彼此了解的好機會，如果有話不識好好講，出口傷人不喜只識插的，是朋友來的嗎？朋友也好做人也好，絕無高低貴賤等級身份之分，只有有品與冇品之分。冇品的人，識來、交來做甚麼？不用遲疑毋須可惜，一於止蝕unfriend可也！
言歸正傳，港鐵載客量飽和想到要拆凳來解決，治標不治本，即使拆了又塞得多幾多個乘客？繁忙上下班時間各個月台的擠擁程度等車到的情況，靠拆凳解決得來的話就好了，唔該快手啲！講呢啲！
不過唔該《蘋果》公道啲，阻碇嘅，唔係啲凳，擺明係班尸位素餐私家車接送出入，從來唔使亦都唔會當然唔得閒理乘客死活嘅極品啦！唔好屈啲凳好唔好？
張慧敏
http://www.facebook.com/HKcareerdoctor