去年經已寫過「熱愛洗廁所」，今年又有家長嫌棄兼投訴要他們的寶貝洗廁所的新聞，真的沒完沒了！今次變本加厲，是家長不滿報讀職業訓練局課程的子女，被派到酒店實習居然要洗廁所，憤然向校方大興問罪之師。又有在服務行業實習的學生因吃濃味三文治遭上司訓斥和禁止，家長帶子女一起找學校算賬。沒有最怪獸，只有更怪獸。
職訓局主席表示，行業如電梯維修和水電安裝非常缺乏人手，雖然施政報告有提出推新學徒制，但在怪獸當道的今日，要推動職業教育，最大阻力，來自家長。於是呼籲僱主清楚列明晉升途徑，認為有助改變家長想法，「講清楚有幾多年經驗同學歷，就有乜人工、升職。」真正人都癲！試問誰敢、能保證做幾多年就必定有職升、必定有薪加？除非共產黨，齊食大鑊飯，做唔做都三十六！
我最鍾意看讀者留言，生鬼抵死兼而有之，深得我心慳番我唔少手骨力，抄出來讓大家苦中作樂，笑一笑，世界更美妙！
「點解要子女喺出面受呢啲氣箒，自己開間酒店畀佢咪得囉！」
「應怪獸家長要求，校方可考慮讓學生帶外傭返學，反正這類學生畢業後佢老母都準備養佢過世！」
「當要做實習時叫自己屋企個工人做咪冇投訴囉！」
「我個仔咁叻讀到I大喎，點可以實習洗廁所？」
「以佢對酒店業嘅熱誠，梗係最少都要畀個實習CEO佢啦！無CEO都要總經理啦，點可以做呢啲低級嘢㗎！」
「咁收埋喺屋企用金鐘罩罩實佢啦，包無事！」
「唔好以為洗廁所小事，以前年代唔知咁多病毒，乜愛滋梅毒椰菜花疣肝炎古靈精怪HVP，𠵱家知道入廁所唔小心隨時無命，呢次怪獸家長醒目！」
張慧敏
http://www.facebook.com/HKcareerdoctor