前日，保利文化（3636）開始招股，魏力打畀經紀H想做孖展，昨早卻收到回覆，指因中資銀行「閂水喉」，只能做孖展額的一半。何解有錢唔賺？情況好罕見。就在此時，人行公佈正回購1,000億元人仔。收水陰霾再起，強勢股紛紛開始下插，IGG（8002）、金蝶（268）、中外運（598）逐隻倒下。
去到下午，報價機一片紅海，魏力忙於減持，身旁財經台就響起：「人民幣連跌第六日，曾創下2012年12月以來最大跌幅。」過去一周，人仔兌美元跌近1%；港元顯著轉弱，由7.756抽上7.762，可謂完美散水格局！呢一浪，強勢股料會比上一轉隊得更勁，因歐美股市強到爆，基金爭逐回報，根本無必要在中港股市「磨爛蓆」，沽貨轉戰歐美，相當合理。再者兩會前政策不明朗，減持觀望為上策，抽新股又凍結大批資金。無得玩！
港股已無安全之所，「舊經濟」無力翻身，「新經濟」獲利沽壓龐大，醫藥、水務勉強仍守得住，但基金要清貨食糊，冇乜板塊可倖免。業績揀股，長江基建（1038）主打歐美基建業務，去年錄得理想增長，純利升24%至116.4億元，全年派息1.86元，現價股息率達3.9厘，相當不俗。股價昨業績後突破橫行區，升3.2%，可買入作中長線持有。
魏力
http://www.facebook.com/2012jason