啱啱結束嘅冬奧或者受注目程度唔及夏季奧運，不過，啲賽事都好刺激，其中最精采嘅賽事，我會揀男子冰球；而成功衞冕嘅加拿大就唔單止好波，陣中更不乏靚仔。可惜，英超球隊修咸頓只係招攬加拿大冰球隊嘅其中一位教練古加（右），而唔係球員，否則一眾姊妹淘就有眼福喇！
加拿大男子冰球隊喺今屆冬奧成功衞冕，隊長兼前鋒嘅哥士比、出擊後衞杜迪及門將派斯等都功不可沒，而最正嘅係佢哋個個都睇得兼打得。不過，加拿大可以奪金，亦唔可以唔提佢哋教練之一嘅古加。德國籍嘅古加，喺球隊度係專門負責收集敵軍情報同埋分析對手實力，令主教練可以運籌帷幄。唔知道修咸頓嘅女班主嘉菲蓮娜係咪睇中古加呢一點，所以招攬佢入球隊嘅領隊層；而54歲兼從未涉足過足球會工作嘅古加都好識做，向修咸頓領隊普捷天奴大派定心丸，話會全力支持對方。
其實，修咸頓領導層玩cross over一早有前科，喺9年前佢哋亦招攬過成功帶領英格蘭欖球隊奪得03年世界盃嘅教頭活禾特，成為球隊技術支援總監。不過，嗰次就唔多成功，活禾特上任一年之後，就辭職收場。文：吾中