據非正式統計，女人一般情傷期較短，當男的茶飯不思時，女人早已擺脫失戀開闢新天地，情感和投資都需要學識乜係「決絕」，萬一炒股坐艇，也不至於因深潛而溺斃，話說噚日A股午後着火，快速斬纜救了Samantha一命，否則令持倉組合就由「嚴重」變為「危殆」，近日「左手來，右手去」的市況，已蠶食緊本年至今的努力，好不沮喪。
意志消沉之際，的士大佬路經冇乜車的東隧，當堂無名火起，政府月中竟然宣佈「紅加東減」隧道分流方案難產，搞咗場大龍鳳，浪費咗700萬顧問費，最終答案竟然係乜都唔做，有冇滑稽成咁？如張局長覺得疏通紅隧流量呢條數太難計，其實你只要落去搵個牛頭角順嫂問吓，佢都識答是兩條隧道減價。梁營政府最講民意，又或者拎700萬喺本報做個電話問卷調查，廣大市民即時答到閣下。
東西兩隧重要股東中信泰富（267）公佈業績，澳洲鐵礦終有實質進展，去年盈利增長9%優於預期，該股本月累升逾一成，但要真正「富」起來仲有一大條路行，當中隧道收入繼續錄得增長，該部份純利為6.11億元，增加9%。
兩條隧道盈利其實只佔中信泰富業務組合的8%，東隧專營權於2016年到期，希望CY能嚴詞狠批：中信泰富唔能夠未富先驕！
Samantha
本欄逢周一、三、五刊出