聯儲局前主席伯南克唔經唔覺抖咗成個月，佢最近接受美聯社訪問時話，已開始籌備撰寫回憶錄，內容主要關於佢任職儲局期間嘅前塵往事，重點係講番金融海嘯期間，儲局如何應對呢場百年一遇嘅金融大災難，希望能幫自己平反。
伯南克笑住話，佢在任期間，政客對佢充滿敵意，成日彈佢推出嘅救市措施，德州州長佩里早兩年誇張到話佢賣國，所以好想透過撰寫回憶錄講番當時嘅情況，等大家了解儲局當時點解要咁做，希望讀者可從中理解，喺當時變幻莫測嘅環境下，儲局已經做咗正確嘅決定，借此還佢一個公道。
伯老話，近期開始集中思維籌備新書，幾個禮拜後將會同出版商傾細節，估計呢本書要一年時間才能夠完工。伯南克學富五車，又以行文同埋思路清晰見稱，佢呢本書實在令人引頸以待。