今年踏入80歲嘅廠商會為咗賀壽非常大手筆，捐咗3,000萬畀理大發展全人教育，理大亦將校園內其中一座大樓以廠商會命名。
噚日喺命名典禮上，理大校長唐偉章同廠商會會長施榮懷就互相搞爛gag兼互送高帽。唐校長話喎，阿施之所以咁慷慨，可能同佢個姓「施比受更有福」有關，阿施就話廠商會之所以會選中理大，一來兩者自上世紀五十年代已經有淵源，亦可能因為佢嗜甜，而唐校長英文名正正係「Tim（Timothy）Tong」、即係甜糖喎。原來阿施幾年前喺理大讀過一個《易經》與工商管理關係嘅課程，而佢醉心《易經》，皆因《易經》講求天時地利人和咁話。