科網企業走勢凌厲，噚日最新出爐嘅胡潤全球富豪榜，騰訊（700）老闆馬化騰、阿里巴巴創辦人馬雲、國產手機商小米老闆雷軍當然榜上有名。45歲嘅雷軍更加係首次以280億元（人民幣．下同）財富，打入呢個富豪榜，大中華區排57，全球就排339。
至於雙馬，馬化騰以840億元財富，首次打入大中華區富豪榜十大，排第8，全球就排70；胡潤榜估計，馬雲嘅財富跟馬化騰比較仲差一大截，只得425億元，喺大中華富豪榜排28。
不過，如果阿里巴巴今年可以成功上市，明年佢喺胡潤榜嘅排名肯定可以大執位嘞。
講番入開富豪榜嘅本地富豪，超人李嘉誠繼續係大中華區首富，受惠於澳門賭業嘅銀娛（027）主席呂志和緊隨其後，排第二。
可惜，超人喺全球富豪榜竟然跌出十大，較舊年滑落五位，去到第12位。