秘書V睇到一段新聞，連聲叫好，用WhatsApp傳俾左丁山閱讀一番。新聞話耶路撒冷有一萬一千隻狗，狗屎屙到隨街係，清潔需時，又浪費納稅人金錢，因此耶路撒冷市政府宣佈檢驗狗屎DNA，搵出狗主，要罰款。
咁即係話首先要有埋隻狗嘅DNA，先至可以配對，美國有州份早已實施罰款條例，驗狗DNA要每次60美元，驗狗屎DNA也要60美元，並不便宜。秘書V話：「香港應該效法啦，好憎一啲人拉狗出街屙屎，唔理他人感受呀？」狗主會唔會合作呀，左丁山細個時候在鄉下俾狗追，讀書時在沙田又試過俾狗追咬，結婚後住在村屋，鄰居養咗一隻德國牧羊狗，雙腳站立想撲過嚟之時，有左丁山咁高，所以現在見到大狗就運路行，驚驚地，對養狗之道，完全冇興趣。秘書V乃愛狗之人，養咗一隻小狗，佢話在香港養狗要領牌，狗耳仔裝咗一塊晶片，記載狗隻及主人資料，照計領牌時一併驗埋DNA，並無困難，以後一驗狗屎DNA，就可以對照驗證，捉到一啲冇公德心嘅狗主罰款。
香港有此等人咩？秘書V話：「有呀，譬如喺非跑馬日彭福公園就泊滿車，全部係狗主拖狗遊公園嘅，彭福又大又靚，可以放狗，係我地狗主樂園，但從停車場入公園嘅隧道，已經臭氣逼人，有不少狗屎漬。我有一次入到去放狗，一對年輕夫婦或情侶拖住兩隻大狗，其中一隻屙屎，佢地竟然唔執，男人只用一張報紙冚住，踩兩腳就想走，我唔抵得，嗌住佢地：執狗屎呀。佢地對我怒目而視，我係咁嗌，佢地卒之死死氣執狗屎。你話嘞，彭福公園咁好地方，難得可以放狗，唔少狗主竟然冇公德，放狗屙屎唔執屎，破壞場地，影響其他家長帶埋細路嚟遊花園，係唔係抵罰錢吖！」聽落又係，香港有啲人係幾唔理會他人感受嘅，譬如有人入到馬場高聲吵架，互揚臭史，又或者開收音機聽粵曲，簡直莫名其妙。香港人話香港係文明城市，效法耶路撒冷處理狗屎，並不為過！但回心一諗，香港邊度有咁多執法人員？一來周街請唔到工人，二來特區政府有錢都拎去起公屋啦，香港仿效耶路撒冷？不如祈禱先。