科網股有散水迹象，大市形勢急轉直下，有概念、估值平、走勢靚嘅股份買少見少，蠟筆小新食品（1262）竟有齊三大優點，可謂絕無僅有，值得放入購物籃。
中國證券網報道，上海市政府新聞辦官方微博噚日透露，上海市通過關於修改《上海市人口與計劃生育》決定，將條例中可以要求再生育嘅條件，由「雙方均為獨生子女」改為「一方為獨生子女」，並於下月起實施。報道又指，目前浙江、江西、安徽、天津、北京等地，已先後實施「單獨兩孩」政策。可以預期，未來內地小孩數目有增無減，主打果凍、甜食等兒童食品嘅蠟筆小新，產品需求肯定旺爆，概念夠晒！
睇估值，彭博綜合券商預測，蠟筆小新市盈率17倍，較同業旺旺（151）嘅30倍，大幅折讓逾四成，前者去年至今股價節節上升，後者則有波幅冇升幅，絕非無因；秤身家，蠟筆小新現價市賬率3.2倍，旺旺則達12.4倍，蠟筆小新平足一條街。
睇圖表，蠟筆小新噚日逆市再創新高，收報5.93元，升3.1%，喺零蟹貨情況下，肯定仲有得去，惟9 RSI已升至84嘅超買水平，戰友可候回試5.8元樓下買入，短線用20倍PE做目標，可見6.98元，潛在升幅18%，屆時估值仍較旺旺平逾三成。
唐牛