雖然騰訊（700）、環保、醫藥股仲喺度破頂，但噚日中港股整體嚟講好有洗倉feel，內地創業板創新高之後急插4%，除咗咁樣之外，港股近排亦出現咗好多唔妥嘅訊號。
首先，最近連香港證券行都話冇咗大陸水做新股孖展，資金緊到確實唔尋常；另外，錢荒「風眼」嘅興業銀行又走出嚟撲水，繼上星期招標20億人民幣同業存單之後，噚日再嚟出招標50億人民幣，又係唔妥。
睇埋指標，港滙轉趨波動，同時人民幣在岸價CNY同離岸價CNH同時急轉弱，呢種環境似似哋歐債危機嗰陣。
唯一好啲嘅消息，反而係人民銀行正回購，事關正回購唔停，就證明人行暫時睇唔到有危機存在。如果股市又跌，人行又停咗正回購，到時反而證明阿爺都覺得唔妥，咁就仲驚。
不過，再睇吓圖表，就發覺唔多對路。先講恒指月線圖，最快今個月、最遲下個月有機會出現MACD沽售訊號，係典型熊市中前段嘅走勢。
醞釀呢個訊號其實熟口熟面，回想起嚿年年中錢荒一役過後，港股拗腰急彈，MACD線保持喺訊號線樓上，巧妙8月避過沽貨訊號一劫，反過來成為買入機會，港股然後出現幾個月光景。
呢輪恒指再跌，近廿年只出現5次嘅月線MACD沽售訊號又再次醞釀，要出現化危為機，先決條件係恒指下個月急彈，否則長線走勢極惡劣，今年繼續睇跌。今次唔知會唔會又咁好彩避得過，除非炒股唔炒市，你手上咁啱全部係破頂股騰訊、環保股同醫藥股之類，否則持有現金嘅話，最好睇多一個月先諗中長線入市。
建行現強烈利淡訊號
港股醞釀長線利淡訊號之餘，相比嚿年錢荒時，仲要加咗餸。建行（939）月線圖唔覺唔覺已經跌破咗2009年到而家嘅支持線，月線MACD亦出現上市以嚟首次雙熊強烈利淡訊號，再跌情況都相當惡劣。單睇圖表，恒指同建行都係「準備出事feel」。
轉個話題，講番近少少，近期出業績股份，出親幾乎都見光死，滙控（005）業績前連日上升，掉番轉公佈業績遜預期，股價跌超過2%，強如TCL通訊（2618）第四季業績靚仔，都洗7%。
晉佳本身估今日公佈業績嘅信義玻璃（868），應該交到靚數，圖表亦唔差，年初到而家連守兩次6元後，最近業績前股價調整亦連日守住保歷加通道中軸，走勢轉為理想，照計博得過。
信義玻璃績前寧小注
不過，睇番近期業績後股價九隻跌先得一隻升，因此短線博信義業績都惟有審慎，只宜業績前先落一小注，股價對辦先至向上溝再加注，再上望7.5元，跌破6元止蝕。
晉佳
本欄逢周三刊登