金融大鱷索羅斯（George Soros）曾經講過，投資股票市場目的就係獲利，一定要避免同股票談戀愛，避免感情衝昏頭腦，衝動行事。索羅斯點出，唔好同股票談戀愛，背後原因就係一旦同股票談戀愛，就會產生咗偏好、偏見，只留意股票嘅優點，而忽略當中潛伏咗嘅危機，最終結局，梗係搞到蝕錢離場。
如果恒指成份股嘅藍籌公司代表成熟穩重嘅好男人，香港股市之中，其餘1,500幾家上市公司，就係屬於不適宜談戀愛嘅壞情人公司。
對壞情人要狠心薄情
壞情人公司嘅股票，的確比藍籌股票多咗幾分刺激，偶然會出現一支大陰燭，再無「程程」整番支大陽棍，令投資者又愛又恨。係唔係壞情人嘅股票就一定係唔好？所謂壞情人，其實就係喺唔啱嘅時間遇上唔啱嘅人。換句說話講，壞嘅股票，其實係時機唔啱先至正確。因為當大部份投資者充斥住一種唔捨得嘅情緒同感覺，股票喺高位唔賣、低位又唔買，每次見到又心傷，其實就已經完全忘記咗買股票最基本嘅原則，就係要審時度勢。
喺適當嘅時候，Prof J教你一定要做冷血嘅投資動物，狠心加上薄情，係對付壞情人嘅上佳方法。
坊間有句說話係咁講，「男人不壞，女人不愛」。但係Prof J又可唔可以寫成為「股票唔壞，投資者唔愛」。
講開令你又愛又恨嘅股票澳門勵駿（1680）， Prof J有幸喺上星期出席咗佢哋嘅管理層飯局，聽完佢哋噏咗一輪嘢之後，Prof J覺得呢隻令你同我傷心過嘅股票再一次向大家招手，張開佢強有力嘅臂彎，似乎想大家產生翻兜嘅感覺，以6.5大洋做一個支持！決定今日起重新吼實佢，出發！
徐燦傑
中國銀河國際財富管理主管
本欄逢周三刊出