一間「自暴自棄」的上市公司係點嘅樣？海迪覺得百盛（3368）已經作出了一個經典的示範：CEO就係「臨時」嘅，連CFO都係「署理」。咁大間公司，要搵番個人來坐正都咁難？
無心經營等賣盤
百貨業現時面對咁多挑戰，一個「臨時」或「署理」員工，在有需要的時候，有沒有膽量去作出果斷的決定？所以百盛這一間公司，可以說是已無心經營。佢最大嘅價值，可能就係等賣盤而已。
百盛大股東想走人，市場上早有流傳。證券界更曾為百盛「估底」，指它仍持有約80多億物業，相等於每股淨資產值約3元左右。
去年底金鷹（3308）主席王恆，就以每股約2.4元，增持百盛至逾5%，因而「浮出水面」，當時唔少同業都覺得，王恆又係想搭「順風車」。只可惜今次「低處未算低」，百盛業務繼續轉壞，股價連插數日，就連無寶不落的王恆，現時賬面都要輸錢。
百盛賣盤係咪真的值得期待？海迪唔敢抱太大期望。一來百盛的分店老化，數目既多而且分佈較散，經營上係咪仲fixable，實在值得商榷；二來現時整個商業地產供過於求，併購無助於解決問題，唯一方法是要關舖，而這一步現時仍未出現。
儘管百盛近年新開的分店已無法賺錢，但佢洗濕個頭，應承咗嘅分店未來兩年仍要繼續開。至於金鷹（3308）和銀泰（1833），佢哋都係配合母公司嘅地產項目去開舖，可以縮沙的空間更少。這個行業問題，似乎在可見將來都難以解決。
海迪