人大、政協兩會將於下月召開，八方近排翻閱唔同地方嘅政協名單，發現原本係吉林省政協嘅《南華早報》總編輯王向偉，喺上年換屆時，已經唔再係政協，喺吉林省政協嘅網頁，唔見咗佢個大名。
2011年王向偉上場做《南早》總編時，因為佢嘅吉林省政協身份，令人懷疑《南華早報》已不復當年勇，更加話呢份報紙係「紅早」，去年《南華早報》唔少舉動，例如110周年特刊，回顧百年大事，唔見咗八九六四同2003年7.1，都被人詬病。吉林省政協最新呢份名單喺上年1月update，已經搵唔到王向偉，即係話，佢已經冇做政協成一年有多。
喺《南早》打過工嘅時事評論員林和立同八方講，佢幾個月前已聽聞王向偉冇做政協，但係要睇《南早》仲係咪咁紅，唔係只係睇老總仲有冇擔任內地公職，而係睇吓佢嘅編採方針。佢話《南早》報道有關內地嘅醜聞、中港關係時仍然非常有顧忌同較傾向北京，加上《南早》嘅揸弗人係郭氏家族，佢哋喺內地生意利益太多，實在難以話《南早》已經回勇。