華資證券行搵食艱難，唔少轉用低佣搶客，曾經講過鬥減佣唔係生存之道嘅證券界老行尊許照中，噚日就改口風，話佢創立嘅六福金融唔會坐以待斃，除發展多項業務，仲推出網上戶口0.08%特低佣金，雖然比耀才證券（1428）嘅0.068%仲係貴少少，但最低收費10元，屬行內最平，變相加入低佣一族。
許照中2012年成立六福金融，雖然講過希望五年後上市，但一直低調冇乜宣傳。佢認為𠵱家係時候轉高調，賣廣告吸客，除咗行家用開嘅低佣招數，六福金融仲會搞花臣，將每單交易嘅1蚊佣金捐畀慈善機構。
查實六福金融舊年已經好積極咁開拓業務，除期貨同財富管理，仲做埋強積金顧問，又拍住景鴻吸納投資移民客。身兼橫琴新區發展諮詢委員會委員嘅許照中正吼實橫琴商機㖭。