近期傳媒界中人聚首，都不時講起資金來源神神秘秘、至今仲未正式公佈幾時面世嘅《香港晨報》，據聞佢哋出好大手筆喺行內挖角，準備好大展拳腳咁，而網上已經流傳一個疑似係《香港晨報》嘅logo，粗體藍字白底，有啲人睇完話好似吉儀，認真大吉利是咯。
有行內人透露，呢個就係《香港晨報》嘅報頭，但係亦都有人話，呢個其實係《香港晨報》員工卡片嘅背面嚟㗎，甚至有傳有啲人已經開始派緊《香港晨報》嘅卡片㖭。
到底邊個先至係真？真係要等佢哋面世先至知喇。
但係《香港晨報》又幾時先會面世呢？據坊間流傳都係6月中或者6月底，重點係一定要喺7.1遊行前夕，究竟有乜嘢用意？好明顯啦。