入投行做banker係唔少人嘅夢想，為乜？搵得多，同埋型囉！如果入去做埋sales，博殺幾年，之後升上神枱指揮大局就可以印印腳，之後40歲退休環遊世界。聽落好perfect，不過呢啲錢真係唔係人人賺得起，至少一個想30歲前生仔嘅女仔一定冇份。
菲菲朋友Yuki喺「摩字頭」投行做sales assistant，本來做得好哋哋，點知公司突然問佢轉唔轉做sales，真係OMG！由錢嘅角度睇，佢啲同事話，現時市況差，所以人工已比以前少好多，不過少極都高過佢現時三倍！不過，Yuki今年26歲，佢嘅夢想係要30歲前結婚生仔，然後happy ever after。如果真係要轉做sales，頭四年一定要衝鋒陷陣，努力箍客追quota，收工後分分鐘走幾場飯局、酒局直落happy hour。遇到市差時求神拜佛都想撈客，壓力大到自己都顧唔掂，仲想湊仔？真係冇可能。
經過人生交叉點後，Yuki雖然明知轉做sales呢個機會只得一次，因為公司根本唔會叫一個過咗三張嘅人走去做junior sales，但人各有志，佢最終決定寧願賺少一截都一定要生仔。咁再一次證明，女人嘅黃金時間真係短好多，太多事情都要喺30歲前決定。
題外話，Yuki講到女banker會較男banker早退休，因為男人使錢使得快：「錢使去邊？你明啦。」
Fifi
本欄逢周二、四刊出