滙控（005）全年業績遜預期，執筆之時滙控外圍股價插水3%，加上A股唔爭氣，後市睇嚟又係易跌難升，搵食寧願聚焦績優股，起碼有數得計。
時代集團（1023）剛公佈中期業績，令人眼前一亮，截至去年底止6個月賺2.5億銀，按年增長32%，兼創出上市以來最強半年業績，可喜可賀。
時代集團主要業務為製造名牌手袋及皮具，客戶星光熠熠，包括Coach（6388）、Fossil、Michael Kors等，同時又引入意大利品牌TUSCAN'S，在中港作零售。雖然內地嚴限三公消費，奢侈品成為被打擊對象，但時代集團收益依然有兩成增長，盡顯龍頭地位優勢；在嚴控成本下，毛利率按年亦升逾兩個百分點至24.6%。
噚日午後，時代集團股價急抽，相信亦與派息慷概有關，中期息按年增長67%至10仙，假設末期息維持16仙，股息率達5.5厘，吸引到暈。
集團手頭持有10.2億銀，相當於市值嘅逾兩成，財務狀況夠晒穩健。
時代集團噚日收報4.77元，升5.5%，雖然業績靚爆鏡，但現價竟較歷史高位仍低近兩成，落後嚴重程度可想而知，現價年度化市盈率不足10倍，點秤都仲有水位。
唐牛