粵劇老倌阮兆輝將於下月底同鳴芝聲劇團嘅蓋鳴暉喺長洲主演幾場神功戲，據知去年10月鳴芝聲劇團同神功戲主會簽晒合約，仲幫手邀請阮兆輝演出，阮兆輝有簽約同收定金，呢次神功戲係由長洲鄉事委員會贊助。但馮仁昭噚日收風話阮兆輝近日知撞期辭演，主會追究要佢賠償八萬蚊香油錢。
撞期願賠雙倍定
阮兆輝違約風波，馮仁昭打畀佢老婆兼經理人鄧拱璧，佢解釋：「成件事係我搞錯，其實我哋舊年好早時間應承咗阿嗲（梅雪詩）下月底做戲，咁啱之前鳴芝聲打嚟，我唔記得咗又應承，發現撞期。鳴芝聲係畀咗3,000蚊定輝哥，戲行規矩，神功戲主會唔會同演員簽約，輝哥只係同鳴芝聲有口頭承諾，因為係我哋唔啱，所以願意賠償鳴芝聲雙倍定金，輝哥再拎兩萬蚊添香油錢。不過鳴芝聲日前就堅持要我哋賠番八萬蚊，輝哥酬金都係三萬，唔明八萬條數點嚟，我哋好有誠意解決件事。」怕唔怕影響阮兆輝日後同鳴芝聲合作，鄧拱璧話：「呢單嘢係會，將心比己，佢哋係會嬲。」不過鄧拱璧就堅持用佢嘅方案解決。鳴芝聲劇團負責人劉小姐噚日話：「件事處理緊，我哋唔方便回應。」
撰文：馮仁昭