體壇拾趣：
出櫃哥連斯搶風頭

雖然時代進步冇咁守舊，但同性戀同職業運動仲係對立，不過網隊中鋒積遜哥連斯就衝破呢個隔膜，周日作客湖人一戰上陣11分鐘，成為北美職業運動史上，首位公開同性戀取向嘅現役球員。
網隊上周六先同35歲中鋒積遜哥連斯簽下10天短期合約，周日作客西岸包尾嘅湖人就立即派佢上陣；以積遜喺球場嘅表現，原本唔值得大事報道，佢上陣11分鐘，未幫網隊拎分，只係貢獻咗2個籃板同1個偷波。最值得關注係積遜嘅性取向，勇氣可嘉嘅佢上年5月已公開自己嘅同性戀取向，雖然都受到部份保守派批評，但主流意見都好支持佢，好似球星拜恩、前總裁史坦都公開支持，美國總統奧巴馬亦接見佢㖭。

贏湖人更贏尊重

經過半季失業，積遜獲得重返NBA嘅機會，曾在01至08年效力過嘅網隊，當年隊友傑特仲做埋教練㖭。第2節約10分鐘，傑特派遣積遜上場，主場球迷都向佢報以熱烈掌聲。積遜賽後就講：「我知道我可以重返球場，今仗也感覺很好，體力亦十足；大銀幕、犯規等等都讓我好懷念，我現在仍然是籃球員，我不認為自己身份有變。」網隊贏波功臣，好似交出30分7助攻嘅迪朗威廉斯、攻入25分嘅皮雅斯，都冇怪風頭被積遜搶去，皮雅斯講：「佢好勇敢，我希望唔止美國，甚至全世界，都可以以舒服嘅環境，歡迎同性戀者一齊比賽。」NBA新任總裁阿當施華亦都話，聯盟營造一個包容同尊重他人嘅環境，足夠引以自豪。