中環在線:長和記者會冇變有 - 李華華

中環在線:長和記者會冇變有 - 李華華

長實(001)、和黃(013)今個禮拜五公佈2013年全年業績,原本上星期公司內部仲講緊今年冇記者會,最新消息係,星期五晏晝兩點半舉行記者會,但係超人李嘉誠會唔會刻意避席,交個主場畀小超李澤鉅展身手,仍然係未知數。
咪以為區區一場記者會,要改日期時間有幾難。長實、和黃業績記者會除咗鏡頭前出現嘅李嘉誠、李澤鉅同和黃董事總經理霍建寧外,仲有系內最top嗰十幾名高層都要出席,包括大家熟識嘅樓神趙國雄。
呢班人個個忙到癲,真係分分鐘億億聲上落,要夾齊人出席都唔係咁易。據聞班高層都係呢幾日先知禮拜五有記者會,而唔係原先被通知,只有分析員會議。
老闆心意隨時可以變,做得打工皇帝都應該好明白呢個道理。