港股正式進入放榜高峯期，今日有匯控（005）及恒生（011），周五則輪到長和系，將成為後市風向標，觀乎已派成績表嘅東亞（023）及友邦（1299），表現尚算不俗，希望具指標作用。
大股走勢難測，個別板塊會繼續成為焦點，今日推介嘅水務股桑德國際（967）係其中之一。集團涵蓋供水及污染處理整個價值鏈服務，包括設計及建設供水及污水處理設施，以至營運及維護供水及污水處理設施，以及製造供水及污水處理設備。桑德於2010年上市，成交一向疏落，但自從年初於新加坡除牌後，成交明顯轉活，投資價值因而釋放。桑德短短兩個月累升近九成，不過現價市盈率僅20倍，比起行業龍頭如光大國際（257）及北控水務（371）平均約40倍，折讓50%，名副其實半價大平賣。當然，桑德主打三四線城市及農村地區，規模難與後兩者比較，但勝在發展潛力夠大，新近連環中標多個項目，包括安徽、新疆、江蘇、福建等地，未來盈利肯定幾何級數上升，做大做強乃時間問題。
睇圖表，桑德上周兩次試衝9元大關均無功而還，但依然穩守上升軌之上，隨着全國兩會下月初召開，相關環保政策將會慢慢滲出，勢必成為桑德破關嘅藥引，趁近期股價整固買入，值博率甚高。
唐牛