中環人出差爭分奪秒，唔少人可能喺公司開完會即刻趕去機場上機，最好當然係唔使排好耐隊就搞掂登機手續、寄埋行李啦。國泰航空（293）舊年12月開始就同機場合作，試用自助行李托運服務，𠵱家主要係經濟艙旅行團旅客試用，3月下旬擴展至個別旅客使用，到時就可以自己快快趣搞掂。
荷蘭阿姆斯特丹機場、倫敦希斯路同格域機場幾年前已經引入自助托運服務，香港係亞洲首個設有呢個服務嘅國際機場，四個行李托運裝置設於E行段，舊年底開始試用，機管局打算試行半年，現跟國泰合作試驗，將會陸續加入其他航空公司。
國泰暫時只供經濟位團體旅客試用，需時75秒就搞掂，至今有超過5,000名旅客試用。服務不適用於前往美國、加拿大同新西蘭嘅航班，事關當地使用唔同嘅行李處理系統。