安倍經濟學推波助瀾下，舊年日經指數飆升近57%，日本上市公司亦向股民豪派禮物，好似派米、送禮券、甚至日本人最愛睇嘅職業棒球賽入場券，包羅萬有。不過，香港股民應該比較實際，上市公司千祈咪學，唔該派股息。
野村研究調查話，舊年頭九個月全日本有近三成嘅上市公司向當地股民送禮，總共1,082間公司，破晒紀錄。
當地有上市公司會送股民一包5公斤白米；亦有公司送出職業棒球賽入場券。日本連鎖書店丸善嘅母公司就決定唔派股息，改送面值1,000日圓（約75.6港元）嘅禮品券代替；全日空同AEON百貨公司亦豪爽派禮券。
日本公司送禮除咗想受𠱁股民開心，想佢哋肯長揸隻股票，仲因為日本上市公司嘅小禮物一律免徵稅，支出計入公司嘅娛樂消費。最近就有日本散戶出書，分享攞着數攻略㖭。