傳媒喺捍衞新聞自由呢條路上，一啲都唔孤單，至少有6,000人同行，包括以《從不喜歡孤單一個》一曲成名嘅朱主席（朱壽仁）。唔喜歡孤單一個嘅朱主席，噚日孤伶伶現身反滅聲集會，席間一度同坐喺佢隔籬嘅市民雞啄唔斷，幾乎俾其他參與者滅佢聲。
話說八方噚日同一班行家，一早去到特首辦外嘅馬路坐定定，等參與反滅聲集會。由於坐得較前嘅，多數都係啲傳媒工會成員，大家都熟口熟面，所以當駭然發現朱主席坐喺度時，都覺得好驚訝，更surprise嘅，當然係佢就算去集會都着到登台咁款，藍色絨布西裝褸襯紅色格仔褲，喺人群中好鬼突出。
八方不忘同呢位網絡紅人打招呼，朱主席都好興奮咁say hello。冇咗彭家麗拍住上，單拖赴會嘅朱主席都幾投入㗎，不時攞手機出嚟影相；當李慧玲同鄭經翰發言時，佢就解釋畀身邊嘅市民聽，自己係支持新聞自由而唔係支持佢哋兩個喎。
忘形吹水 自稱「朱主席」
其間佢同旁邊一位女士傾得好投契，越講越大聲，結果俾其他參與者叫佢細聲啲。而查實呢位女士，曾經問過朱主席點稱呼，當聽到面前人自稱係「朱主席」時一臉茫然，好明顯呢位女士不知道朱主席是誰，冇欣賞過朱主席嘅美妙歌聲啦！
mailto:[email protected]