新鴻基地產（016）老闆郭炳江近月都幾活躍，先後落場跑樓梯、跑十公里馬拉松，噚日仲唱歌娛賓，唔怪得當有人問佢幾時退休，佢即刻好大反應咁話自己60幾歲，仲後生啦。
新地噚日喺馬灣挪亞方舟舉行盆菜宴慶新春，筵開73席，宴請超過800名長者，係第四年舉辦呢類活動。郭炳江着起紅色唐裝衫襯番活動主題，仲跟勞工及福利局局長張建宗，同埋一班公公婆婆喺台上合唱賀年歌《歡樂年年》，不過現場都唔係好聽到佢把聲。
郭炳江之後笑住話，有聽過呢首歌，但係上台前就冇練過，只係跟住局長，佢唱乜就跟住唱，佢舊年都有上台表演擊鼓。新地今次主要邀請來自荃灣社區中心嘅長者，年紀最大嘅一位有105歲，現場所有長者加埋有近6萬歲。