以往《亂噏24》由黎智英、蔡瀾及倪匡主持，今集稍有不同，由陳淑莊（Tanya）擔任主持一職，反過來訪問倪匡先生，別有一番驚喜。節目今日起至周五每日播兩集，讀者可於《蘋果動新聞》網頁觀看，也可登入 http://bit.ly/appletalk24重溫，足本版於周四晚11時播出。
倪匡讚真君子
蔡瀾是大情聖，媾女極有心得，他在節目中說：「媾女唔係話乜辦法，媾女最緊要準！」肥佬黎有點不爽：「你以為科學呀？邊有得準？冇可能，你唔好亂噏啦！」認識蔡瀾多年的倪匡代為解釋：「佢（蔡瀾）嘅意思係不打冇把握嘅仗。」倪匡又盛讚蔡瀾是真君子，絕不會給機會予沒興趣的女生，無謂浪費對方時間：「睇起上嚟佢同女方非常好傾，但傾吓傾吓，旁邊啲人就會忍唔住笑，知道個女仔實撞板。」
對於縱橫情場的蔡瀾會結婚，肥佬黎感到匪夷所思，殊不知蔡瀾的答案更有趣，他說：「我係一個好孝順嘅人，我爸爸話『你到時候了』，好啦，你既然要我娶老婆，我咪娶一個畀你囉。」蔡瀾又指當時處處有女朋友，於是買了機票給兩老，讓他們去日本、韓國及台灣挑選新抱，他說：「但有個條件，就係永遠冇得嘈，因為係你哋揀。」這一招又應用在妻子張瓊文上，蔡瀾稱將來若要娶二奶、三奶及四奶，都要由妻子選，他笑說：「佢當時應承咗，但最後冇遵守，哈哈！」
撰文：馮國康
