噚日參與遊行嘅外國記者協會人群中，包括爭取港視發牌主題曲《This is my dream》嘅原作兼原唱者Kashy Keegan。Kashy話港視事件之後，一直有留意香港嘅最新發展，加上本周六喺香港開演唱會要由英國嚟香港，所以一知道有呢個捍衞新聞自由嘅遊行，就馬上嚟參加。原來Kashy都係新聞工作者嚟㗎，至今做咗15年，𠵱家喺英國消費雜誌出版商IPC Media打工。佢話新聞自由對佢嚟講係講嘢嘅權利，例如新聞自由被箝制，港視發牌呢件事冇人報道，唔會有咁多人知，亦唔會有咁大迴響，加上得悉李慧玲被封咪，香港新聞自由不能一退再退，所以點都嚟撐場。