被網友封「燈神」嘅「大埔LuLu」董嘉儀，近日一連估中四場歐聯賽事，佢對估波明顯信心大增，期待今年6月世界盃再貼中。現年20歲嘅LuLu雖然係宅男女神，但打扮樸素，唔染髮，冇穿耳，連指甲油都冇搽，佢嘅pure形象有別𡃁模，近日網上流出一批佢萌爆學生相，唔知粉絲受唔受呢？
天生大眼袋同包包臉嘅LuLu噚日話：「呢啲係我招牌，一睇就知冇整容。」佢出道被指似唐寧，其實真人似年輕版曾華倩，佢話：「我媽咪仲似，有機會希望同曾華倩扮母女。」
拒拍咀戲
LuLu嘅學生相大部份跟同性黐頭芒，佢自嘲怕醜吸引唔到異性，又話有興趣拍電影，但堅拒拍咀戲，佢話：「接受唔到。」對手係張智霖都要請食檸檬，除非係台灣藝人張孝全或可令佢獻出銀幕初吻，佢話：「佢係我偶像，有幽默感，可以考慮吓。」
撰文：馮仁昭
