著名填詞人林夕、經理人郭啟華、監製蔡德才日前為了黃耀明而聚首一堂，暢談跟明哥的前塵往事，關於音樂的事，社會的事，而他們做的說的，一直跟香港人息息相關，由明哥談到世界議題，一切從商台節目《叱咤樂壇》（叱咤Playgroup）訪問開始。
撰文：楊潔雯
訪問當日，主持人謝茜嘉先要求各人申報跟黃耀明的緣從何來？郭啟華第一個舉手說：「我哋識咗30年喇！嗰時讀書搞個慈善演唱會又冇錢，喺商台聽到有個DJ做節目，但係唔算好紅，嗰個就係明哥！試吓搵佢果然唔收錢，嗰時就識咗明哥喇！嗰時我好恨做DJ，明哥做通宵節目，佢就叫我去睇，所以我成日去睇佢做節目。」
曾退夕爺歌詞
至於夕爺跟明哥因音樂而相知相交，明哥說：「我哋都需要時間磨合，好多時都要傾，等佢知我諗乜，然後幫我寫詞。我知佢同阿菲（王菲）係唔使講，可能大家風格唔同，不過，我真係唔知我有退過佢啲歌詞喎！」磨合後，夕爺為明哥撰寫不少出色的歌詞，例如最新派台歌《太平山下》就極盡諷刺時弊。至於監製蔡德才讀書時是達明一派的忠實絲粉，現更成為人山人海的一分子，他直認是飲達明的奶水大：「嗰時有樂隊同劇場crossover，真係好型！」
物以類聚，他們是一班有理想的音樂人，將訊息化成音符融入歌詞，傳達政治、宗教及同志平權等訊息，明哥說：「我由一開始做音樂就去記錄時代，好多人問我，𠵱家好似好關心社會，我覺得唔係囉！翻查我哋嘅歌，係用不同方法記錄香港唔同嘅社會，所以喺今次演唱會，我最近出嘅EP，都係關於呢個社會，但係我會用好個人化嘅角度去做畀大家睇。」
棉裏針滲政見
夕爺筆下有不同類型的歌詞，以往常用隱喻方式透視社會現象，但《太平山下》歌詞直接了當：「經典的獅子山，越望越像夢幻，現在是爛鬥爛，今天的紫荊花金得太糜爛」，夕爺說：「寫歌詞係要遇唔遇到某一類歌手，好似黃耀明咁有商有量，絕對可以達到嗰個效果。好似《六月飛霜》（陳奕迅主唱）你問我寫乜？我唔止寫一種嘢，係成個社會結構，個環境本質出到好多現象，而呢啲係適宜廣東流行曲記載香港。但有時遇到啲嘢想畀出嚟，三讀又唔通過，我就會用棉裏藏針，陽奉陰違嘅方法，寫咗我好想寫嘅嘢出嚟，明眼人真係一睇就明，唔明嘅佢就好享受，作為一首情歌聽到想喊，我就好似高高在上睇住，我真高興！呢一邊聽到佢淚流滿面，另一邊睇到我嘅政治密碼，幾開心，最近一張碟咪就係咁囉！」