最低工資下，飲食業經營困難已是不爭事實，甚至連標榜新派的中式酒樓，服務質素亦大不如前。早前出席朋友在X府的婚宴，侍應阿姐望住席上吉位問：「其他人出唔出現？」三唔識七，點知先？「咁剩返啲菜點？」放喺度先，睇睇其他人會唔會要，「放喺轉盤會俾經理鬧。」咁你放喺吉位咪得囉！點知阿姐遞碟菜過嚟，叫我將碟菜放喺吉位度，嗰刻阿姐流露出「我至係老細」般的眼神，令眾人為之側目。點客做事，原來是今日婚宴專門店的待客之道。
呢間專門店近年大肆擴張，賣點是「紅館式」浮誇裝置：catwalk天橋、水晶旋轉大舞台、噴煙機等，令新人仿如明星。可惜羊毛出自羊身上，搭個影城咁誇嘅棚，但得臨記做演員，個show結果係點，不言而喻。翻查資料，老闆原來係物業炒家，交易動輒幾千萬甚至過億，但搞飲食絕非有大水喉、大製作就搞得掂。
而創業板上市的譽宴（8107），食物、服務水準平穩，但盈利表現飄忽，去年首七個月，公司僅賺101萬元，2011年和2012年分別虧損288萬元和賺2,223萬元，雖以婚宴做賣點，但收入佔總額不足三成，大部份來自平日用膳。
譽宴上市當日曾炒上3蚊樓上，現時已向1蚊配售價進發，去食飯無問題，但想賺佢飯錢？Samantha只歎一句：買你怕！
Samantha
本欄逢周一、三、五刊出