機管局主席張建東與「梁粉」董事羅康瑞嘅權鬥風波，喺羅康瑞讓步之下告一段落。據聞，羅康瑞近來都轉趨低調，唔似之前以候任主席嘅姿態說話，新近傳出機管局下任主席嘅人選可能另有其人，包括做埋今年嘅貿發局主席蘇澤光。
羅康瑞自從舊年1月被委任為機管局董事之後，就盛傳佢會接替原本今年任期滿嘅張建東做主席。
點知政府舊年10月委任張建東做多一年，直至明年5月，之後就引發羅、張二人就機場島北部商業城項目鬧不和，董事局最終冇採用羅康瑞嘅方案。
唔知道係羅康瑞做到冇晒癮，還是政府感到經過商業城一役，再擺羅康瑞落去做主席，佢都未必可以充份發揮，新近傳出蘇澤光係下任機管局主席人選之一。
本身屬「唐營」嘅蘇澤光同CY關係似乎不俗，舊年6月佢跟CY一齊訪美，喺晚宴致辭時高度讚揚CY，指香港非常幸運由CY掌舵；除續任一年貿發局主席，政府舊年10月成立「香港與內地經貿合作諮詢委員會」，蘇澤光亦被委任為主席。
年近70嘅蘇澤光早年喺政府任職，1978年轉職商界，85至92年任貿發局總裁，1995年任地鐵主席，03至07年做電盈（008）副主席，之後擔任貿發局主席至今。以佢嘅經驗，做機管局主席應該唔會引來太大異議。
張建東腳痛情況轉差
講開張建東，佢舊年請假兩個月飛去美國做髖關節置換手術，8月回港後一直篤柺杖行路，最近情況差咗。
好似上周國泰（293）貨運站開幕，佢本來有份行幾級樓梯上台祝酒，最終因行唔到樓梯而冇上台，真係要多多保重。
李華華
mailto:[email protected]