雙辣招法案，張炳良用口頭承諾加辣時先交立法會審議：拒絕將有關安排寫入法例，引起泛民議員集體離場抗議，反對政府帶頭破壞法治，呼籲張炳良日後唔好走數不認賬。泛民究竟太天真定太儍，梁班子走硬數。
前年上場新政府擺出一副港人優先姿態，抽水討好本土派，當時北京仍未覺察到梁抽水行徑，大大助長本土派行動，但政務官已認為「港人港地」有問題，梁及其房屋政策顧問睬佢哋都有味；堅持上馬，在相關條款未準備好，便高調推出港人港地拍賣。但唔知點解，最近半年有關政策銷聲匿迹，完全提都唔提，賣地表內都冇咗港人港地，大家驚唔驚？
另一單係人都知嘅走數行為，就係強積金（MPF）對沖長期服務金，本來講到似層層今年上馬，勞工界在施政報告前收到風，於是立即做嘢，在傳媒層面炒熱佢，夾定計扮成功爭取。點不知在毫無預告下，最後施政報告中隻字唔提，工聯會都被梁耍了。又一單人所共知走數事件。
至於堆填區擴建及新建焚化爐，就係一宗撼頭埋牆式走數事件。本來上屆政府千辛萬苦過晒骨，準備埋尾之際，遇上特首選舉，梁振英為討好一班政治上白癡兼幼稚之環保佬，扮晒有型話，無需要擴建及興建新焚化爐，天馬行空地吹牛，認為只要大家齊心，源頭減廢就得，水抽完後，上屆政府焚化爐計劃得唔到立法會支持，惟有擱置。
梁贏得民望，贏埋特首個位，當日稍為對政府政策有認識之人，都知道源頭減廢猶如「阿媽係女人」，永遠正確，但遠水救不了近火，日後一定會走數，自打嘴巴。果然，今日黃錦星為乞票，表示擴建堆填區及興建新焚化爐刻不容緩，真係現眼報。
特首大計仲多過奧巴馬
至於預告任內一定會走數者，除資助房屋建屋指標外，仲有全民退保、標準工時，一定搞唔掂。呢類利益分化對立嚴重之大政策，強如第一任奧巴馬，挾強大民意支持上台，也只能夠做好一瓣公共醫療改革，仲要在上半任開波。
梁改革香港大計多過奧巴馬，但上半任冇大政策做過，一味拖、做研究，自己民望已跌至「表現失敗與拙劣之間」，根本欠缺足夠政治能量處理有爭議政策，唯一只有狂派福利、但越派邊際效用越低，今年勁派二百億經常開支，民望升幾點，維持幾個星期就立即打回原形。
梁振英政府，已經注定係一個走數賴賬嘅政府，人不要面，天下無敵，香港市民仲可以奈佢乜嘢何！一個連北京中央都敢去走數嘅人，又點會將香港人放在眼內。
添馬男