各位老細，我係阿金大波金，我真是一個非常幸運的金雞，在我30年的迎接生涯真是遇上了很多對我好好的男人！今期這三個型男是上一個世紀的相遇，大家還對我咁長情，真係感激流涕。
【雞人雞事1】煩爆家輝
梁家輝真是一個好好的演員，對演戲好熱血，明明take one得，他「屎」都要take多幾廿個令到自己受傷嘅！前幾個月又跌斷肋骨！他執着又長氣！煩到你爆炸，他只煩男人，他拍了多部陳可辛的戲！嘻嘻！《金雞sss》邀請他客串他從無托我手㬹！到了現場亦一句對白都無改！
他喜歡女人、喜歡抽煙、飲威士忌、數口精，當年我買了一部車，訂錯了顏色，我跟他講不如你買，他要了！然後一用，用了十幾年！他好慳家亦不浮誇，不買名牌只着sponsor，老婆持家有道亦不虛榮，他有幾輩子用不完的身家，他前一陣子還好興奮話我知他接了部戲，片酬好好pay，個樣好似啲新仔執到金，不過他常常仗義幫很多導演和電影！他縱橫影壇數個世紀，女主角一個一個老，他還一部一部接！
梁家輝叫我九嫂我叫他九哥，因為一部電影《江湖告急》，當然我們的緣份也來自電影，還有一碗雲吞麵，當年他已拿了男主角獎但仍是寒微影帝，我亦是一位小茄喱啡，我們各自去看電影，散場時在人群中碰上，打了個招呼，各自又咁啱去隔籬食番碗雲吞麵，就係咁我哋時不時都提起呢碗雲吞麵，因為這個情景記載了我們那些年青春美好的時光！最近他的一部電影《寒戰》攞咗好多最佳男主角銜頭，好威！我問他：「你梗係剃光頭來搶戲？哪有一個警務處長剃光頭還留了個八字圓圈鬍鬚成個大反派咁？」他說：「因為有部戲還要連戲……」下刪五千字，我沒有聽入耳，亦不重要！一個角色的成功是需要用功和設計！他來客串《金雞sss》的當日下大雨，他由早等到晚，他知道我們辛苦，他亦自得其樂，我亦金媽上身，叫我的小雞和他聊聊，他當然聊得好開心！但我想也想不到他們在聊的是兒時喜歡的卡通片人物！多天真！沒辦法！其中一小雞話：「家輝哥我同你對孖女是同年生！哈哈哈……」
【雞人雞事2】鵬哥試咪
2014-28=1986年就認識盧海、盧海海、盧海貓、盧海鵬試咪……他有太多花名！我的直覺好少錯！盧海鵬係撐我！何解：當年有個長命節目叫《EYT》，我在這節目裏只是一個插科打諢的小小諧星，我亦不埋堆，亦不懂擦鞋，我從來不是老師、上司、老闆、監製、導演、阿哥、阿姐喜歡的乖同學！常常開口夾着脷，有一次我的話又刺中了一位阿姐級的人物！我當然懵盛盛唔知啦！這位阿姐從此再唔請我食雞翼！我是好鍾意食㗎！盧海鵬好得閒，他有一日靜雞雞同我講：「唉！得閒食個橙，包你唔會眼癱癱！你講錯句嘢得罪咗嗰隻……」嘩！我好驚訝！吓！咁都講錯！當時盧海鵬係用嗰「隻」字！點解你要咁形容佢？我深深記了28年！鵬哥從來不多廢話亦不多言！由《EYT》開始日日都聽佢試咪，粗口用得又絕又精準，話說原來他來自廣州西關半塘。
鵬哥說：「我哋識講嘢就識講粗口，粗口是分地域性，廣州粗口好直接，喜歡用7字9字同個西字嗰啲生殖器官。後來我因為某些事被下放到東莞，入到東莞！嘩唉！啲粗口就唔同廣州，就以『倫』字為主，吓你件東莞死倫嘅，即是話你條臘腸仔咁短！後來我游水偷渡來香港，游到岸，突然俾個差人捉住：『你兩條死倫今晚第一批喎！』吓又係講個倫字嘅，死喇！我心諗仲未游出東莞！嚇倫到我呢！超！原來我已經游到香港尖鼻咀！原來香港人都鍾意講個倫字！」從小聽鵬哥試咪，無人會覺得被冒犯或un耳，他還有能本事將隻粗口字用到渾然不知！
【雞人雞事3】惡死阿Y
黃偉文係屬雞，佢好旺我。我和他在20年前有個只播了三個月的電台節目《娛樂性騷擾》，當時已經風靡一時。和他合唱了一首他填詞的歌《初一十五》，上了各大流行榜。他亦客串過我一部自資監製的電影《四面夏娃》。但演《金雞sss》的托也哥之前，他已經十幾年沒有拍過戲。今次又旺到我，又得咗喇！嘩！復出就是4千萬男明星喇！
但其實我很怕他的，他好惡㗎！好久好久之前，有一次他同我講……
Y：我book咗咩咩Robinson髮型大師剪頭髮。
如：吓！你都要剪頭髮？剪乜髮型呀？
Y：光頭就唔使剪㗎喇！？
如：係囉！光頭剪乜啫？
Y開始火：冇頭髮都要剪㗎！點都有啲毛長出嚟㗎嘛！都要剃㗎……x#@&*
如：Sorry！Sorry！
有次，他搬了，一間在山頂全維港景三千幾呎的Apartment。我說：「嘩！好靚呀個View！你間屋居然大過我嗰間！」他說：「點解我間屋唔可以大過你嗰間呀？」他講嘢一針見「骨」，轉數快！
多次見到佢話：「阿xxx，你做乜攞咗你阿嬸件衫出嚟着呀？」有一次則在髮型屋，有位阿姐級的人物遇上了Y。她就好「行」咁問：「咦！嚟剪頭髮呀？」 Y：「我係嚟腳底按摩嘅！」佢愛恨分明，我目擊很多他不喜歡的人，他真的忍得住永不虛偽地不跟他們打招呼或做啲門面工夫！但當阿Y不是阿Y，而是當一個演員的時候，他真的很好相與和好易相處！《金雞sss》他的對白要講日本口音的廣東話。其實很難演繹，更何況一個十幾年沒背對白的人？每次一NG，他就會顯得尷尬而且更會面紅！這個怕醜的Y，卻正是我久違了的黃偉文！
