周日澳職上演「一頭一尾」對決，榜尾第10位的墨爾本雄心主場出擊，面對榜首的布里斯班獅吼。以「死數計」，雄心當然冇得踢，不過以球隊近況回勇，就算仍有前鋒基維爾缺陣，決心比客軍更盛，雄心受讓平/半博下盤。
雄心自1月由史捷比接任教練，戰績有明顯改善，史帥領軍後僅嘗一敗，近3仗更先後擊敗FC悉尼、珀斯光輝及威靈頓鳳凰全取9分，當中包括上仗以5球大勝鳳凰，氣勢甚盛。雖說主隊仍未擺脫榜尾位置，但實際距離第6位的季後賽資格僅差8分，球隊仍未絕望，趁氣勢旺盛，有力挑戰榜首的獅吼。雄心雖仍有老牌國腳基維爾因傷缺陣，後衞維拿特仍停賽，不過前鋒大衛威廉斯大勇，近3仗累積5個入球，加上基斯諾保、歷克卡爾馬等主力撐場，有力助主隊保不敗。
獅吼近況回落
布里斯班獅吼穩居榜首，常規賽冠軍甚穩，難免球員心態也較季初放鬆，上仗竟然爆冷主場不敵紐卡素噴射機。獅吼屬今季澳職作客王，10戰已累積6勝，加上中場麥特麥基傷癒復出，中場米拿則停賽期滿復出，有一定憧憬。但他們已連續兩仗作客和波失分，加上仍有傷兵中場林巴達拉迪斯，而且作客雄心往績亦平平，近4仗作客只得1勝1和2負，包括上年以2:3見負，今仗就算少讓也不值支持。文：牽牛