【宗崢奇戀之犯眾憎】楊崢跟黃宗澤的一段霧水情緣，掀起連翻巨浪，先被同輩歐陽妙芝、陳嘉容圍插搶人老公兼玩高竇，之後被後輩姚書軼、莊思敏狂寸做騷玩失場，真是臭事一籮籮。前晚莊思敏在深水埗一間樓上時裝店行貓步，密實白天鵝造型不是重點，重點是莊思敏怎樣繼續取笑楊崢，莊思敏笑說：「C1都冇新意啦，呢個話題悶喇。」爆楊崢做騷「放飛機」，不怕前輩問罪嗎？莊思敏淡定說：「我諗佢冇我電話，要搵我唔難，但要搵都唔係搵我一個，太多人要搵。」
黃佩霞微博晒多朋友
最新消息是傳楊崢有一個十歲大的私生女，楊崢已經速速否認，不過，莊思敏繼續跟大家開心share：「我都係今日先聽到人講，今日返電台都有人問我，我都唔知真定假。不過呢啲都好似十年前嘅事，我有朋友幾年前聽過，呢個都係傳聞，沒完沒了。」而黃佩霞昨日在微博狂貼舊相，晒與歐陽妙芝、琦琦、姚書軼等名模的友誼，表示無事無非地見證了人生不同的階段，似向有模界獨孤精楊崢示威。
與莊思敏同場的江若琳最近接受行性感，穿上全場最性感的大露背透視長裙，長裙透視見到喱士底褲邊，惹人遐想，江若琳說：「唔係預太多時間畀我換衫，又冇全身鏡，所以我都冇睇過。」江若琳表示和這個樓上舖的時裝設計師合作好多年，今次行騷是友情價，她說：「係講心唔講金，而且好信任大家，我仲喺工作人員面前換衫。」現場見到江若琳穿上的9吋高踭鞋，她說：「之前去上海行騷都着過，仲跌低過，都有啲驚，但為咗靚冇計。」
採訪：張俊銘
攝影：黃偉雄
