一張喺公眾場合嘅咀嘴相，令黃宗澤同楊崢呢對曝光冇耐嘅姊弟戀受到考驗。連日嚟楊崢被揭多單臭史：曾做小三、搶人男朋友、Bosco母親唔接受、甚至有個10歲私生女．．．每日新聞日日新鮮。不過當近日嘅報道都盛傳Bosco斬纜，二人分手嘅同時，有最新嘅雜誌就「唱反調」，話「可靠人士」透露Bosco其實仲係心大心細未有決定，好似企喺十字路口等過馬路咁，唔知行邊面好。
雜誌引述該位「知情人士」話，Bosco最初覺得自己年紀都唔細，所以被發現戀情，都唔似以前咁秘密。咁多負面新聞，Bosco都受唔少壓力，但佢仍然信任女友。仲話呢排佢哋都好忙，加上又怕有狗仔隊跟，所以冇見面，只係電話聯絡。不過Bosco仍然顧住女友感受。仲話Bosco 0依家好迷惘，因為佢對楊崢仍然有感覺，所以暫時唔打算作出咩抉擇。爆料人士又話Bosco近日心情似乎麻麻，加上病咗，所以平時喺片場好活躍又多嘢講嘅佢，呢排就唔多出聲坐埋一邊。而傳聞分手一事，「可靠人士」話連Bosco都覺得奇怪，因為佢完全冇講過「分手」兩個字。