二月十八日晚，出席上海總會春茗，永遠名譽會長李和聲、理事長王緒亮及一眾副理事長、理事、名譽顧問及大約十位八位嘉賓，總共約八九十人出席，氣氛十分熱鬧。上菜前，遇到一位內地經濟師，聽佢所言，在香港係耳熟能詳，但出諸內地人之口，就覺得大膽，因為佢話：「凡係國家話要支持嘅行業，避之則吉」，箇中道理，市場派人士當然明白，但內地炒A股，香港散戶以至基金炒內地股，都鍾意追捧「國家隊」垂青嘅股票，或者係「兩會概念股」，年年樂此不疲，短炒或有利錢，長揸則恐怕得不償失，因為一啲概念行業、概念股，全靠消息或國家政策支持，似長不大的孩子，前途冇保證。
一位來自上海嘉賓致辭，祝大家「馬到成功」，左丁山聽慣、寫慣「馬到功成」，未曾聽過「馬到成功」，以為呢位上海嘉賓講錯，又或者係「大陸式中文」。點知第二日，記者小G同左丁山講：「乜有馬到成功嘅咩，習主席見連主席係講馬到成功嘅噃！」連忙搶過佢手上張「大公報」，見到原文如此：「習近平說……你們是我在農曆馬年會見的第一批台灣朋友，在此給大家拜個晚年，祝大家馬年吉祥、龍馬精神、一馬當先、馬到成功。」
哦，習主席講「馬到成功」，唔怪得上海來賓亦係咁講，一定係中共內部早已如此通傳，所有幹部統一口徑講馬到成功，不講「馬到功成」。小G有啲不服氣，認為即使係領導人都唔應該扭轉嚟講一啲約定俗成嘅用語嘅。左丁山突然醒起：「喂，你細佬係中大中文系畢業生，在中學教中文，或者佢知得更多呢，不如問吓佢。」於是小G捉住細佬查詢，個半鐘頭後，佢傳來細佬嘅答案，左丁山又學到嘢。據小G弟弟搜尋所得，「馬到成功」確有出處，見元代無名氏《小尉遲認父歸朝》第二折：「那老尉遲這一去，馬到成功」，意思係一開始就成功，掂晒。至於「馬到功成」，出自元代鄭廷玉在《楚昭公》第四折：「只願你馬到功成，奏凱而還」，意思係事情順利，得到勝利。睇完短訊，無話可說，只能如此解釋。習近平一上台就捲起打貪腐之風，而且集中打周永康石油幫，以雷霆萬鈞之力打落去，梗係表現出一開始就掂晒，馬到成功啦。