開波Kick off :A餐無貨 B餐斷市 - 馬啟仁

開波Kick off :A餐無貨 B餐斷市 - 馬啟仁

有關A餐B餐嘅選擇,因為A餐加推馬拉松甜品之作,忽然又搶手番好多,尤其是吸引到一班運動友,都話對A餐另眼相看,講到口水流晒,好似家陣真係坐響茶餐廳,你開口叫就有得食咁樣!呢啲表面係表態暗地係抽水嘅話題之所以受歡迎,可能係因為金錢與女人都係好吸引嘅話題,於是八婆與狗公就齊集大發議論,若果係題目轉一轉,變做朱古力味嘅屎,同屎味嘅朱古力,睇你仲有冇咁好興致去揀。
咁鍾意揀,不如提啲真係有得揀嘅嚟玩,唔使去好遠,球壇就已經大把嘢畀你揀……
護級球會老闆,寧願搏盡響盃賽爭冠軍但有可能降班,定係無驚無險冇人記得但穩穩陣陣留班?
超級勁旅領隊遇着輸波,賴球證怨對手定係真心認輸?
二線頭一線尾球星,寧願夾硬留響一線球隊齋𢭃人工但坐冷板,定係袋少啲但響二線球隊做大佬?
小學雞同學仔啱啱開始踢波冇耐,應該跟風去踢前鋒定係聽自己心聲去守龍門?
落場埋緊門嘅射手俾人響禁區邊撞到,應該即跌定係盡人事飛入禁區先跌?
落場防守緊嘅後衞面對對方嘅進攻,係畀對手單刀起腳博龍門救到,定係落腳博球證睇唔到?
香港球員冇波踢,應該諗轉行,定係踢英超?
啱啱開始睇波,應該捧老竇愛隊場,抑或揀同學仔最鍾意嗰隊嚟撐?
揀男朋友,應唔應該揀足球排第一嘅蠻牛呢?
揀女朋友,咁橋遇着個女球迷本來搶住執到,點不知你愛藍佢愛紅,咁仲應唔應該繼續拍落去呢?
愛隊贏波,究竟應該上網歌頌愛隊,定抽對方水好呢?
愛隊輸波,究竟應該扮睇唔到時運高,定索性即刻換波衫做勝利球迷呢又?
睇波大把嘢有得畀你揀,使乜嘥心機揀人哋個老婆吖,各位老闆!
KEYMAN
now TV主持