日聯下周開鑼，例牌一周前先有日超盃送上畀各位球迷熱定身，而連續兩屆聯賽冠軍廣島三箭（圖）繼續霸者本色，上周六喺東京國立競技場，靠野津田岳人同淺野拓磨各入1球，2:0擊敗上季亞軍兼日皇盃冠軍橫濱水手。呢兩隊波，近一兩年可謂冤家路窄，三箭上季臨尾先壓過水手喺聯賽封王，但日皇盃就決賽輸畀佢哋，睇嚟今季日聯開鑼後，佢哋又要鬥餐死。
另外，三箭周中亞冠盃將會主場迎戰北京國安，賽前竟然出餐單同對方打心理戰，喺官網推出餃子湯（圖）畀球迷食，擺明車馬想同國安講聲：我食硬你。其實，三箭過去已經出過呢招，之前同FC首爾對賽，就推出過人蔘燉雞湯，而對中岸水手時，就有澳洲炆牛肉，真係夠創意！