陳靜（DaDa）去年患上抑鬱症，鑽牛角尖下閃電息影三個月，冷靜下來後經圈中友人紛紛鼓勵，她決定在影壇重新起步，開竅的DaDa更把負能量變成復出籌碼。重新投入工作後，DaDa目標更清晰，她更決心色戒3年，專心發展事業，追回任性退出的那段時間。
撰文：比華利
去年8月在微博任性宣佈退出的陳靜，當日以情緒病為由息影，經過3個月沉澱，去年11月又閃電復出，其間她曾遭監製伍健雄和導演錢國偉鬧爆。畢竟DaDa手握金像獎最佳女配角獎項，成功免死重生，受過教訓，DaDa學精要蛻變成為火鳳凰。
面對青黃不接的影圈，DaDa甫復出，馬上參演電影《Z風暴》和《唐伯虎衝上雲霄》，仍算搶手。抑鬱症病癒的DaDa明顯開竅，專心工作，她更定下3年守齋，全心一意工作。
抑鬱經歷助演戲
DaDa日前接受訪問，由到場到離開都四萬咁口。重現歡顏的她充滿正能量，提到去年底復工初期，她不諱言：「初初復出，我怯怯哋，唔知方向，好怕大家唔接受我，好彩香港人都係有心。𠵱家開咗一排工，我已完全投入番晒，心情好充實。記得自己有病期間，我問過自己係咪真係出嚟面對，得朋友鼓勵，我決定面對現實，無論出返嚟觀眾接唔接受，結果係點，我都會一力承擔，好幸運大家都咁錫我，令我覺得更加要努力。」
經一事長一智，這教訓令DaDa處事變成熟，她承認：「我積極咗，搵到方向同目標，我要追番退出嗰段時間嘅步伐，經歷低潮同谷底嘅心情，正好為我拍戲儲咗好多『籌碼』。」怎把負能量變籌碼？她說：「喺《Z風暴》，我要扮抗癌女子，正好將抑鬱症嗰排複雜心情演繹出嚟，好幾場喊戲，我一諗番舊事就可以流出真眼淚，作為演員，每個經歷都可以幫我演好每場戲。」
已學懂平衡情緒
即使DaDa日前樂極生悲右額爆缸縫了13針，她都化憂為喜說：「我生平第一次縫針，有過呢個痛嘅感覺，將來我要演破相或受傷戲，我就可以將呢種感覺自然演繹出嚟。我覺得人生起起跌跌，當中係好有意思。」她表示復工後便停抑鬱藥，她說：「我𠵱家情緒狀況正常，醫生話我好好，我學識咗平衡情緒，唔會胡思亂想，工作完全係我動力。」
DaDa決意在影壇有一番作為，性感底線會提高嗎？她說：「一切要睇劇情需要，近年電影業蓬勃番，觀眾入場有要求，唔係只要睇性感，仲會要求演員要有演技，𡃁模都out晒。」她現刻要事業不要愛情，她說：「所以未來3年都唔拍拖住，遇到啱嘅先算，我唔想分心。」
感激杜汶澤
陳靜（DaDa）得以復出重生，她表示最感謝經理人施念慈和伯樂杜汶澤，尤其阿澤在她低潮時扶一把，令她感覺人間有情，DaDa說：「當我思緒好混亂嘅時候，我同佢傾訴，佢鬧得我好甘，佢要我出嚟面對，唔准逃避現實。可能阿澤係有經歷嘅人，佢乜都直話直說，完全鬧醒我，每句說話對我嚟講好實用，我會袋晒落袋。」DaDa與阿澤開工，她佩服對方連化妝師甚至茶水阿姐都照顧周到，她說：「呢份態度我一定要學習，令我好尊敬佢。」
至於經理人施念慈的包容和原諒也令DaDa感動，她說：「經過呢次，我哋了解多咗，搵到更合適嘅相處方法。遇到問題，真係唔可逃避，畢竟公司同我坐埋同一條船，我哋應該一齊商量去面對同解決。」
