第二場「徐小鳳走過順逆流，依然金光燦爛2014演唱會」前晚假紅館舉行，小鳳姐邀請盧海鵬、費玉清和陳奐仁做嘉賓。盧海鵬着黑白波點裙襯涼鞋凸腩登場，真假徐小鳳同台放笑彈，小鳳姐笑到用手摸頭說：「每次見佢着成咁我開心又傷心，佢着到好似藥膏。」
「件衫好窄」
鵬哥唱出日文歌《柔道龍虎榜》，自稱大鳳姐的他笑說：「你成家姓徐都嚟撐你場，和音有姓徐，我又姓徐，音樂領班又姓徐，全部除清光。」小鳳姐坦言首次在電視看到鵬哥着波點裙扮自己，心情很複雜，鵬哥抵死說：「嗰時仲着得落，𠵱家件衫好窄，唔知點解件衫唔啱着，凸晒個肚腩出嚟，都唔使戴嗰啲嘢，呢個我自己嘅。」小鳳姐笑問：「聽講你去咗買胸圍？」鵬哥說：「我𠵱家都唔啱着，如果戴埋落去就死火。」
另一嘉賓費玉清出場亦大受歡迎，他以半鹹淡廣東話說：「好開心嚟到做加冰（嘉賓）。」小鳳姐叫他不如講普通話，又問他的樣子怎能比以前更年輕？費玉清笑言常唱歌，有很多知音朋友，令他似食了補品，他又禮尚往來讚小鳳姐身材似美人魚，小鳳姐笑說：「我借畀你着，你都一樣優美，因為係有個秘密，係着咗唔可以坐，只可以企喺度，我啲身材係綁出嚟㗎！」兩人大展扮嘢唱腔，小鳳姐扮林子祥，笑言林子祥是很難扮的歌手，扮張學友的費玉清忍不住笑，又獨唱小鳳姐金曲《順流逆流》，獲掌聲如雷。
撰文：皓騫
