【反滅聲撐新聞自由 2.23上街】
你未必認識李永銓（Tommy Li），但他的作品，你一定見過，滿記、英記茶莊，還有經包裝身價暴漲的「上海錶」。這位被譽為本地最具有影響力的港產設計師，過去甚少談論政治，今日卻站出來，直指香港自由受損程度已達臨界點，「自由逐步收窄，從事創作嘅人，係最大受害者」。溫水煮蛙，自我設限，眼見香港沉淪，這個老早在中、港、日三地發展，但從來沒有想過移民的創作人，顯得很肉緊。
自由受損 無人獨善其身
走進Tommy位於小西灣的辦公室，最引人注目的，是門口幾幅毛澤東版畫，由枯木老毛到草菇老毛，玩味甚濃，「呢批畫全世界巡迴（展覽），喺外國攞咗好多獎，唯一係入唔到中國。」他聳聳肩說。Tommy有一段在鏡頭前「論政」的訪談花絮在網上熱播，記者笑他人氣急升，他卻猛搖頭。
由港視不獲發牌風波到李慧玲被無理解僱事件，反映香港新聞及言論自由極速萎縮，Tommy認為設計行業首當其衝，他表示：「以前係百花齊放但傾向保守，搞展覽見到陽具就好驚；𠵱家係唔想投錯注，黑手係一回事，個氣氛係：擦邊球都唔去得好盡，但創作，正係要衝破界線，呢種自我審查，令行業遲早玩完。」Tommy指香港人安逸慣了，但當大環境正急速變差，沒有人能夠獨善其身。
「最明顯係電影題材，若果連個人創作都受審查或自我審查，要考慮係咪踩界，就很悲哀。」Tommy表示：「過去我哋唔怕審查，因為根本冇（審查），嗰幾幅毛像版畫，入唔到大陸，但喺香港，只要做咗出嚟就冇事，喺北京做同一件事，會俾人封舖，我哋香港人有咁大嘅自由，唔係要濫用，係要好好享受佢，如果連呢啲都冇埋，香港同深圳、東莞，有乜嘢分別？」
「今日嘅政府，認受性好低，行錯一步好多人鬧，只因唔係我選，搵番個認受性，攞番人民對你嘅信任，否則，換幾多個特首都好，仍然寸步難行。」創作講求前瞻性，對香港的發展，Tommy的看法有點悲觀，不過，他就講了一個小故事給記者聽。
無懼黑手 籲勿自我審查
「David Carson係設計圈子入面最有影響力嘅字體設計師，佢講過佢阿爺喺第一次世界大戰當兵，負責拆地雷，每日都要面對死亡、斷手斷腳；我哋做設計，畫吓公仔、整吓啲字，畫得唔好唔會死唔會斷手，如果咁都成日要問，我呢個意念、我寫嘅嘢會唔會踩界，先真正可悲。」革命，由自己的行業開始，Tommy說︰「黑手總會有，起碼，先唔好自我審查。」
這位連被禁的作品都可以輯錄成書送給好友苦中作樂的設計師，這位人稱「壞孩子」的鬼才，的確與別不同。
記者 呂麗嬋