失業率再向下調，去年11月至今年1月的失業率跌至3.1%，就業不足率跌至1.3%（16年最低），這樣低的失業率見證了總就業人數創歷史新高，達376萬四千人，不似美國的失業率下調的同時，就業人數停滯不前（即是顯示不少人已脫離了勞工市場）。
這樣的失業數字顯示出，香港勞工市場供求漸趨失衡，已形成一個勞工佔上風的形態，資方不加薪的話，根本請不到工人。
記得香港工廠仲未北移之時，大概係1981至1983年間製造業工人數字在八十幾九十萬人之間，喺石硤尾、深水埗一帶，時時見到工廠有大橫額字體，招聘工人，邊個介紹工人可得獎金五百（大意如此），工廠搶人搶得厲害，後來廠家發覺可以北移，請工人更易更便宜，起初逐間工廠搬走，至1985年之後，間間工廠跟風，於是不出十年間工廠搬走得七七八八，製造業工人數量自此大跌，至今難以恢復。好奇怪噃，香港並冇因此而產生好大嘅失業問題，經濟並隨之而轉型，成為一個服務型經濟，整個過程十分順利、自然，完全與政府規劃無關，充份顯示市場之力量。
現在失業率咁低，就業人數咁高，靠的是本地消費、服務業與建造業，與傳統出口轉口貿易業無甚關係，消費性內需咁大，大部份當然係靠遊客──2013年高達5,430萬人，其中內地客佔4,513萬人，遊客數量係本地人口之7.7倍，直情「逼旺」香港。咁多遊客嚟，小小香港自然擠迫不堪，有人以為香港應該閂閘，拒絕內地客或大力節制內地客來港，因而出現極端激進派向遊客滋擾事件。左丁山站穩市場角度，當然反對閂門嘅政策，香港民主派與人權監察，開口埋口講人權、自由，但佢哋對同屬一國嘅人民就帶有歧視性，漠視內地人之旅行選擇自由；其次，有人認為自由行對香港經濟貢獻不大，佢哋忽視咗自由行帶來嘅工作職位，其實主要係明益基層工人嘅，口口聲聲講扶貧濟貧之人應該注意到，俾基層人士一份工，係最大最實際嘅扶貧行動，遠勝於政府派糖！