晨早打開電腦，惺忪間見何小姐傳來帶音樂附件電郵乙封，是我從來不過電的許冠傑，心想這位相識三十年的老友真不解人意，完全不體恤我貪靚仔愛猛男的性格。聽都不聽便扔進廢物箱，既不禮貌也不環保，於是隨手按着，打算應酬應酬，誰不知一九八七年的許先生才唱了兩句，就笑到成個醒晒。嗱，你自己看看歌詞：「佢搽到滿身香，啲指甲又吋半長，動作扭擰態度似個姑娘，喜歡對鏡猛自我欣賞。佢成日挽住化妝箱，捽到塊面似隻無常，服裝怪異格調夠晒東洋，一身基佬嘅扮相。」哇噻，然後是揭掉所有神秘面紗的副歌：「人哋叫佢做基佬祥，基佬祥，佢總無怕異相，由得你哋唱。抵封佢做偶像，啊哈，抵封佢做偶像。」
那個遠古時代，達明一派剛剛推出《石頭記》，不要說《忘記他是他》，連欲言又止的《禁色》也十劃沒有一撇，怎麼原來香港樂壇已經有人擺基佬上五線譜，把新鮮脫掉「契弟」外衣的弱勢族群冇遮冇掩高唱入雲？虧我還牙刷刷自封為小島普及文化界頭號同志守衛員，兜風耳居然聞所未聞，羞愧交加啊。 接下來兩段同樣精彩，套楊凡近日的口頭禪改兩隻字，簡直「文起春袋之衰」：「佢同個密友叫Paul Leung，鍾意結伴曬太陽，泳褲仲幼過跳艷舞嘅姑娘，甫士最正志在博影相。佢成日買定兩包薑，走去嘆午夜場，習慣貢夜店活躍歡場，睇啱邊個就上。佢話無謂替我緊張，只因冇你哋咁正常，我自細就有着這種傾向，喜歡嘅嘢你未必會欣賞。人在世就快會幾張，眨下眼就要散場，就要放盡快活過一場，使乜驚你哋唱。」