越秀集團完成收購創興銀行（1111），前晚喺會展舉行春茗兼慶祝，順便跟各方友好聯誼一吓。聽聞為響應國家主席習近平叫大家節儉，呢個慶祝活動只係以酒會形式進行，唔似往年筵開幾十席招呼各界人士，慳得就慳。
習總上場後嚴厲打擊三公消費，自己又高調去平民食肆幫襯，據聞國資委舊年底直情要求央企唔好舉行團年、春茗或周年晚宴，費事企業高層伺機開公數豪飲豪食，此舉令到唔少高檔食肆同五星級酒店少咗生意。
越秀前晚搞呢場春茗，都係簡簡單單以酒會形式進行，仲要係只得一輪食物供應，食完就冇，就連紀念品都冇嘥錢準備，認真慳家。