志雲提到打算聘請一名私人健身教練，但從未幻想過自己可以練到如張家輝般大隻，他笑說：「六嚿（腹肌）我唔恨㗎，做到三嚿我都收貨！」肥佬黎認為以志雲的決心去做，一定能成功，況且現時的健身教練相當專業，既指導健身要訣，又會教如何節制飲食。他以好友趙少康妻子為例，跟了教練一排可謂判若兩人：「一做咗完全個人年輕咗，個朝氣呀、energy呀，完全另一個人咁。」
蔡瀾認為跟買跑步機原理一樣，因為花了錢，所以無論如何總想有點成果，但說到底都是要靠恒心。志雲趁機幽成龍一默：「其實唔係淨係中國人，係人都鍾意俾人管吓！有人督促住你，你都可能做到。同埋我好想好想見自己有腹肌，直情想嚟一次封面！自己屋企喎，哈哈！」
肥佬黎年輕時曾暴飲暴食，但隨着年紀越大，且患上糖尿病後，飲食開始有了節制，他還感恩患上糖尿病：「如果冇糖尿病，我亂嚟㗎，有時抬埋個棺材去食嘢㗎！食到死為止呀。」志雲打趣說：「其實你冇糖尿病，係你太太叫個醫生話畀你聽咋！」